Bacchides

Plautus, Titus Maccius

Plautus. Plauti Comoediae, Volume 1. Leo, Friedrich, editor. Berlin: Weidmann, 1895.

  1. tu prohibebis, et eadem opera tuo sodali operam dabis;
  2. et ille adveniens tuam med esse amicam suspicabitur.
  3. quid, amabo, opticuisti?
Pist.
  1. Quia istaec lepida sunt memoratui:
  2. eadem in usu atque ubi periclum facias, aculeata sunt,
  3. animum fodicant, bona distimulant, facta et famam sauciant.
Sor.
  1. Quid ab hac metuis?
Pist.
  1. Quid ego metuam rogitas? adulescens homo
  2. penetrem me huius modi in palaestram, ubi damnis desudascitur?
  3. ubi pro disco damnum capiam, pro cursura dedecus?
Bacch.
  1. Lepide memoras.
Pist.
  1. Vbi ego capiam pro machaera turturem,
  2. ubique imponat in manum alius mihi pro cestu cantharum
  3. pro galea scaphium, pro insigni sit corolla plectilis,
  4. pro hasta talos, pro lorica malacum capiam pallium,
  5. ubi mihi pró equo lectus detur, scortum pro scuto accubet?
  6. apage a me, apage.
B.
  1. Ah, nimium ferus es.
P.
  1. Mihi sum.
B.
  1. Malacissandus es.