Bacchides

Plautus, Titus Maccius

Plautus. Plauti Comoediae, Volume 1. Leo, Friedrich, editor. Berlin: Weidmann, 1895.

  1. hic nostra agetur aetas in malacum modum,
  2. siquidem híc relinquet neque secum abducet senex
  3. med et Mnesilochum. quas ego hic turbas dabo!
  4. sed quid futurumst, cum hoc senex resciverit,
  5. cum se excucurrisse illuc frustra sciverit
  6. nosque aurum abusos? quid mihi fiet postea?