Dittochaeon

Prudentius

Prudentius, Volume 2. Thomson, H. J, editor. London; Cambridge, Mass.: William Heinemann Ltd., Harvard University Press, 1953 (printing).

  1. EVA columba fuit tunc candida; nigra deinde
  2. facta per anguinum malesuada fraude venenum
  3. tinxit et innocuum maculis sordentibus Adam;
  4. dat nudis ficulna draco mox tegmina victor.
  1. Fratrum sacra Deus nutu distante duorum
  2. aestimat accipiens viva et terrena refutans.
  3. rusticus invidia pastorem sternit: in Abel
  4. forma animae exprimitur, caro nostra in munere Cain.
    5. p.348
  1. Nuntia diluvii iam decrescentis ad arcam
  2. ore columba refert ramum viridantis olivae.
  3. corvus enim ingluvie per foeda cadavera captus
  4. haeserat; illa datae revehit nova gaudia pacis.
  1. Hospitium hoc Domini est, ilex ubi frondea Mambrae
  2. armentale senis protexit culmen; in ista
  3. risit Sarra casa subolis sibi gaudia sera
  4. ferri et decrepitum sic credere posse maritum.
  1. Abraham mercatus agrum, cui conderet ossa
  2. coniugis, in terris quoniam peregrina moratur
  3. iustitia atque fides: hoc illi milibus emptum
  4. spelaeum, sanctae requies ubi parta favillae est.