Cathemerina
Prudentius
Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).
- crux pellit omne crimen,
- fugiunt crucem tenebrae:
- tali dicata signo
- mens fluctuare nescit.
- procul, o procul vagantum
- portenta somniorum,
- procul esto pervicaci
- praestigiator actu.
- o tortuose serpens,
- qui mille per meandros
- fraudesque flexuosas
- agitas quieta corda,
- discede, Christus hic est,
- hic Christus est, liquesce.
- signum quod ipse nosti
- damnat tuam catervam.
- corpus licet fatiscens
- iaceat recline paulum,
- Christum tamen sub ipso
- meditabimur sopore.