Cathemerina
Prudentius
Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).
- O Nazarene, lux Bethlem, verbum Patris,
- quem partus alvi virginalis protulit,
- adesto castis, Christe, parsimoniis,
- festumque nostrum rex serenus aspice,
- ieiuniorum dum litamus victimam.
- nil hoc profecto purius mysterio,
- quo fibra cordis expiatur vividi,
- intemperata quo domantur viscera,
- arvina putrem ne resudans crapulam
- obstrangulatae mentis ingenium premat.
- hinc subiugatur luxus et turpis gula,
- vini atque somni degener socordia,
- libido sordens, inverecundus lepos,
- variaeque pestes languidorum sensuum
- parcam subactae disciplinam sentiunt.
- nam si licenter diffluens potu et cibo
- ieiuna rite membra non coerceas,
- sequitur frequenti marcida oblectamine
- scintilla mentis ut tepescat nobilis,
- animusque pigris stertat in praecordiis.
p.58