Evangeliorum libri quattuor

Juvencus, Caius Vettius Aquilinus

Juvencus. Evangeliorum libri quattuor. Corpus scriptorum ecclesiasticorum Latinorum, Volume 24. Huemer, Johann, editor. Vienna: Gerold, 1891.

  1. Adsociat septem similes glomerando furores
  2. Vis inimica homini penetratque in uiscera serpens.
  3. Sic genus hoc uero mentis cum degenerarit,
  4. Vincula perpetuis deflebit subdita poenis.\'
  5. Atque ea dum populis uitalia dicta frequentat,
  6. Pro foribus mater cum fratribus adstitit illi
  7. Et miscere foris sermonem comminus orat.
  8. Talia tum matris mandatis dicta remittit:
  9. \'Hic mecum genetrix, mecum germana residunt
  10. Corpora. Nam. patria inpletur cuicumque uoluntas,
  11. Ille meo proprium conectit sanguine corpus,
  12. Et matris generisque mei sub nomine habetur.\'
  13. Progreditur templo terrarum lumen Iesus
  14. Et maris extrema terraeque resedit in ora,
  15. Innumeraeque illuc plebis fluxere cateruae.
  16. Ille sed excelsam scandens, quae proxima, puppim
  17. Litora conplenti depromit talia plebi:
  18. \'Ecce sator proprio conmendat semina ruri;
  19. Illa cadunt diuersa solo sortemque locorum
  20. Pro uirtute ferunt. Nam sicubi trita uiarum