Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. Stemmata quid faciunt? quid prodest, Pontice, longo
  2. sanguine censeri, pictos ostendere vultus
  3. maiorum et stantis in curribus Aemilianos
  4. et Curios iam dimidios umerosque minorem
  5. Corvinum et Galbam auriculis nasoque carentem?
  6. quis fructus generis tabula iactare capaci
  7. Corvinum[*](Corvinum P etc.: Housman conj. pontifices.), posthac multa contingere virga
  8. fumosos equitum cum dictatore magistros,
  9. si coram Lepidis male vivitur? effigies quo
  10. tot bellatorum, si luditur alea pernox
  11. ante Numantinos, si dormire incipis ortu
  12. Luciferi, quo signa duces et castra movebant?
  13. cur Allobrogicis et magna gaudeat ara
  14. natus in Herculeo Fabius lare, si cupidus, si
  15. vanus et Euganea quantumvis mollior agna,
  16. si tenerum attritus Catinensi pumice lumbum
  17. squalentis traducit avos, emptorque veneni
  18. frangenda miseram funestat imagine gentem?
  19. tota licet veteres exornent undique cerae
  20. atria, nobilitas sola est atque unica virtus.