Argonautica

Valerius Flaccus, Gaius

Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.

  1. obicit. ille manu subit et vim corripit omnem.[*](omnem M, hominem V )
  2. Inde ubi facta nocens et non revocabilis umquam
  3. cessit ab ore pudor propiorque[*](propriorque V ) implevit Erinys,
  4. carmina nunc totos volvit[*](volvit Voss, soluit V ) figitque per artus
  5. Aesonidae et totum septeno murmure fertur
  6. per clipeum atque viro graviorem reddidit hastam,
  7. iamque sui tauris languent absentibus ignes.
  8. 'nunc age et has' inquit 'cristas galeamque resume,
  9. quam modo funerea[*](funerea M, funera V ) tenuit Discordia dextra.
  10. hanc iace per medias, cum verteris aequora, messes;
  11. protinus in sese conversa furoribus ibit
  12. cuncta phalanx, atque ipse fremens mirabitur et me
  13. respiciet fortasse pater.' sic deinde locuta
  14. iam magis atque magis mentem super alta ferebat[*](ferebat M, furebat V )
  15. aequora, pandentes Minyas iam vela videbat
  16. se sine. tum vero extremo percussa dolore
  17. arripit Aesoniden dextra ac summissa profatur:
  18. 'sis memor, oro, mei, contra memor ipsa manebo,
  19. crede, tui. quantum[*](quantum V, quando C ) hinc aberis, die quaeso, profundi?
  20. quod caeli spectabo latus? sed te quoque tangat