Argonautica

Valerius Flaccus, Gaius

Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.

  1. hoste novo turbata lues, lapsaeque rapinae[*](rapinae Pius, ruinae V )
  2. faucibus, et primum pavidae Phineia tecta
  3. pervolitant, mox alta petunt; stant litore fixi
  4. Haemonidae atque oculis palantia monstra sequuntur.
  5. sic ubi prorupti tonuit cum forte Vesevi
  6. Hesperiae letalis apex — vixdum ignea montem
  7. torsit hiems, iamque eoas cinis induit[*](intuit V ) urbes:
  8. turbine sic rapido[*](rapido C Bon. 2, rabido V ) populos atque aequora longe
  9. transabeunt, nullaque datur considere terra.[*](terra M 2 ut vid., terrae V )
  10. iamque et ad Ionii metas atque intima[*](ultima Renkema, non recte ) tendunt
  11. saxa; vocat[*](vocat Bon. 1, uocant V ) magni Strophadas nunc incola ponti.
  12. hic fessae letique metu propioris[*](lethique Bon. 1, loeti V | propioris etiam V ) anhelae
  13. dum trepidant humilique graves timidoque volatu
  14. implorant clamore patrem Typhona nefando,
  15. extulit adsurgens noctem pater imaque summis
  16. miscuit, et mediis vox exaudita tenebris:
  17. 'iam satis huc pepulisse deas. cur tenditis ultra
  18. in famulas saevire Iovis, quas, fulmina quamquam
  19. aegidaque ille gerens, magnas sibi legit in iras?
  20. nunc quoque Agenoreis idem decedere tectis