Argonautica
Valerius Flaccus, Gaius
Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.
- continuo, volucri ceu pectora tactus asilo
- emicuit Calabris taurus per confraga saeptis
- obvia quaeque ruens, tali se concitat ardens
- in iuga senta fuga. pavet omnis conscia late
- silva, pavent montes, luctu succensus acerbo
- quid struat Alcides tantaque quid[*](quid (apparet) M, qd (i. e. quod) V ) apparet ira.
- ille, velut refugi quem contigit[*](cotigit V ) improba Mauri
- lancea sanguineus vasto leo murmure fertur
- frangit et absentem vacuis sub dentibus hostem,
- sic furiis accensa gerens Tirynthius ora
- fertur et intento decurrit montibus arcu.
- heu miserae quibus ille feris,[*](feris Schmitz, ferae V ) quibus incidit usquam
- immeritis per lustra viris. volat ordine nullo
- cuncta petens: nunc ad ripas deiectaque saxis
- flumina, nunc notas nemorum procurrit[*](procurrit V, procumbit QC, percumbit M ) ad umbras.
- rursus Hylan et rursus Hylan per longa reclamat
- avia: responsant silvae et vaga certat imago.
- At sociis immota fides austrisque secundis
- certa: morae est[*](morae est Madvig, moraes V | aeq' (i. e. aeque) V ) nec parvus Hylas (quamquam omnibus aeque
- grata rudimenta), Herculeo sub nomine pendent.