Argonautica

Valerius Flaccus, Gaius

Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.

  1. quas rapuit telis festina[*](festina C, fortuna V ) vocantibus austris
  2. Hypsipyle; galeam dilectaque cingula regi[*](regi Bon. 2, regni V )
  3. inicit. ille suam vultus conversus ad urbem
  4. sceptra manu veterum retinet gestamen avorum.
  5. nam quia nec proles alius nec denique sanguis,
  6. ipse decus regnique refert insigne parenti.[*](parenti Madvig, parentis V )
  7. inde ter armatos Minyis referentibus[*](ter Egnatius, cf. Aen. XI 188, Apoll. Rhod. I 1059, per VC | referentibus SM, referentes V | orbes M, urbes V) orbes
  8. concussi tremuere rogi, ter inhorruit aether
  9. luctificum clangente tuba; iecere supremo
  10. tum[*](Cum C ) clamore faces; rerum labor omnis in auras
  11. solvitur, et celsis conlucent aequora flammis.
  12. scilicet haec illo iuvenem populosque manebant
  13. tempore, Peliacis caderet cum montibus arbor;
  14. hoc volucrumque minae praesagaque fulmina longo
  15. acta mari tulerant. sed quis non prima refellat
  16. monstra deum longosque sibi non auguret annos?
  17. iamque solutus honos cineri, iam passibus aegris
  18. dilapsae cum prole nurus, tandemque quiescunt
  19. dissona pervigili planctu vada, qualiter arctos[*](arctos cod. regius, T, arcos V, agros C )
  20. ad patrias[*](patrios C ) avibus medio iam vere revectis