Argonautica

Valerius Flaccus, Gaius

Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.

  1. terra fugat[*](fugat S, fugae V clare exhibet ) meritique piget meminisse prioris.
  2. Tempore quo primum fremitus insurgere opertos
  3. caelicolum et regni sensit novitate tumentes
  4. Iuppiter aetheriae nec stare silentia pacis,
  5. Iunonem volucri primam suspendit Olympo
  6. horrendum chaos ostendens poenamque[*](poenamque M 2 C, poenasque S, poenaque V ) barathri.
  7. mox etiam pavidae temptantem vincula matris
  8. solvere praerupti Vulcanum vertice caeli
  9. devolvit; ruit ille polo noctemque diemque
  10. turbinis in morem, Lemni cum litore tandem
  11. insonuit. vox inde repens ut perculit urbem,
  12. adclinem scopulo inveniunt miserentque foventque
  13. alternos aegro cunctantem poplite gressus.
  14. hinc reduci[*](reduci S ut vid., M, rudici V ) superas postquam pater adnuit arces,
  15. Lemnos cara deo, nec fama notior Aetne
  16. aut Lipares domus: has epulas, haec templa peracta
  17. aegide et horrifici formatis fulminis alis
  18. laetus adit. contra Veneris stat frigida semper
  19. ara loco, meritas postquam dea coniugis iras
  20. horruit et tacitae Martem tenuere catenae.