Ex Ponto

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. saepe solent hiemen placidam sentire carinae:
  2. non Ithacae puppi saevior unda fuit.
  3. recta fides comitum poterat mala nostra levare:
  4. ditata est spoliis perfida turba meis.
  5. mitius exilium faciunt loca: tristior ista
  6. terra sub ambobus non iacet ulla polis.
  7. est aliquid patriis vicinum finibus esse:
  8. ultima me tellus, ultimus orbis habet.
  9. praestat et exulibus pacem tua laurea. Caesar:
  10. Pontica finitimo terra sub hoste iacet.
  11. tempus in agrorum cultu consumere dulce est:
  12. non patitur verti barbarus hostis humum.
  13. temperie caeli corpusque animusque iuvatur:
  14. frigore perpetuo Sarmatis ora riget.
  15. est in aqua dulci non invidiosa voluptas:
  16. aequoreo bibitur cum sale mixta palus.