Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. deficiunt motumque negant viresque volandi.
  2. Decidit in terram, non concipientibus auras
  3. infirmis pennis, et qua levis haeserat alae,
  4. corporis adfixi pressa est gravitate sagitta
  5. perque latus summum iugulo est exacta sinistro.
  6. Nunc videor debere tui praeconia rebus
  7. Herculis, o Rhodiae rector pulcherrime classis?
  8. Nec tamen ulterius, quam fortia facta silendo
  9. ulciscor fratres: solida est mihi gratia tecum.”
  10. Haec postquam dulci Neleius edidit ore,
  11. a sermone senis repetito munere Bacchi
  12. surrexere toris: nox est data cetera somno.
  13. At deus, aequoreas qui cuspide temperat undas,
  14. in volucrem corpus nati Phaethontida versum
  15. mente dolet patria saevumque perosus Achillem
  16. exercet memores plus quam civiliter iras,
  17. iamque fere tracto duo per quinquennia bello
  18. talibus intonsum conpellat Sminthea dictis:
  19. “O mihi de fratris longe gratissime natis,
  20. inrita qui mecum posuisti moenia Troiae,