Amores

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Dicebam 'medicare tuos desiste capillos!'
  2. Tingere quam possis, iam tibi nulla coma est.
  3. At si passa fores, quid erat spatiosius illis?
  4. Contigerant imum, qua patet usque, latus.
  5. Quid, quod erant tenues, et quos ornare timeres?
  6. Vela colorati qualia Seres habent,
  7. Vel pede quod gracili deducit aranea filum,
  8. Cum leve deserta sub trabe nectit opus.
  9. Nec tamen ater erat nec erat tamen aureus ille,
  10. Sed, quamvis neuter, mixtus uterque color —
  11. Qualem clivosae madidis in vallibus Idae
  12. Ardua derepto cortice cedrus habet.
  13. Adde, quod et dociles et centum flexibus apti
  14. Et tibi nullius causa doloris erant.
  15. Non acus abrupit, non vallum pectinis illos.
  16. Ornatrix tuto corpore semper erat;
  17. Ante meos saepe est oculos ornata nec umquam
  18. Bracchia derepta saucia fecit acu.
  19. Saepe etiam nondum digestis mane capillis
  20. Purpureo iacuit semisupina toro.