Civil War

Lucan

Lucan. M.Annaei Lucani Pharsaliae Libri X. Weisse, Karl Hermann, editor. Leipzig: G. Bassus, 1835.

  1. Castra super Tusci si ponere Tybridis undas,
  2. Hesperios audax veniam metator in agros.
  3. Tu quoscumque voles in planum effundere muros,
  4. His aries actus disperget saxa lacertis:
  5. Illa licet, penitus tolli quam iusseris urbem,
  6. Roma sit. His cunctae simul adsensere cohortes,
  7. Elatasque alte, quaecumque ad bella vocaret,
  8. Promisere manus. It tantus ad aethera clamor,
  9. Quantus, piniferae Boreas cum Thracius Ossae
  10. Rupibus incubuit, curvato robore pressae
  11. Fit sonus, aut rursus redeuntis in aethera silvae.
  12. Caesar ut acceptum tam prono milite bellum,
  13. Fataque ferre videt, ne quo languore moretur
  14. Fortunam, sparsas per Gallica rura cohortes
  15. Evocat, et Romam motis petit undique signis.
  16. Deseruere cavo tentoria fixa Lemano,
  17. Castraque, quae, Vogesi curvam super ardua rupem,
  18. Pugnaces pictis cohibebant Lingonas armis.
  19. Hi vada liquerunt Isarae, qui, gurgite ductus
  20. Per tam multa suo, famae maioris in amnem