Satires

Horace

Horace. The Works of Horace. Vol. II. Smart, Christopher, editor. Philadelphia: J. Whetham, 1836.

  1. primum nam inquiram, quid sit furere: hoc si erit in te
  2. solo, nil verbi, pereas quin fortiter, addam.
  3. quem mala stultitia et quemcumque inscitia veri
  4. caecum agit, insanum Chrysippi porticus et grex
  5. autumat. haec populos, haec magnos formula reges,
  6. excepto sapiente, tenet. nunc accipe, quare
  7. desipiant omnes aeque ac tu, qui tibi nomen
  8. insano posuere. velut silvis, ubi passim
  9. palantis error certo de tramite pellit,
  10. ille sinistrorsum, hic dextrorsum abit, unus utrique
  11. error, sed variis inludit partibus: hoc te
  12. crede modo insanum, nihilo ut sapientior ille
  13. qui te deridet caudam trahat. est genus unum
  14. stultitiae nihilum metuenda timentis, ut ignis,
  15. ut rupes fluviosque in campo obstare queratur;
  16. alterum et huic varum et nihilo sapientius ignis
  17. per medios fluviosque ruentis: clamet amica
  18. mater, honesta soror cum cognatis, pater, uxor:
  19. ‘hic fossa est ingens, hic rupes maxima: serva!’
  20. non magis audierit, quam Fusius ebrius olim,