Aeneid
Virgil
Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.
- aeternum latrans exsanguis terreat umbras,
- casta licet patrui servet Proserpina limen.
- Troius Aeneas, pietate insignis et armis,
- ad genitorem imas Erebi descendit ad umbras.
- Si te nulla movet tantae pietatis imago,
- at ramum hunc (aperit ramum, qui veste latebat)
- adgnoscas. Tumida ex ira tum corda residunt.
- Nec plura his. Ille admirans venerabile donum
- fatalis virgae, longo post tempore visum,
- caeruleam advertit puppim, ripaeque propinquat.
- Inde alias animas, quae per iuga longa sedebant,
- deturbat, laxatque foros; simul accipit alveo
- ingentem Aenean. Gemuit sub pondere cymba
- sutilis, et multam accepit rimosa paludem.
- Tandem trans fluvium incolumis vatemque virumque
- informi limo glaucaque exponit in ulva.
- Cerberus haec ingens latratu regna trifauci
- personat, adverso recubans immanis in antro.
- Cui vates, horrere videns iam colla colubris,
- melle soporatam et medicatis frugibus offam