Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Hinc altas cautes proiectaque saxa Pachyni
  2. radimus, et fatis numquam concessa moveri
  3. adparet Camerina procul campique Geloi,
  4. immanisque Gela fluvii cognomine dicta.
  5. Arduus inde Acragas ostentat maxuma longe
  6. moenia, magnanimum quondam generator equorum;
  7. teque datis linquo ventis, palmosa Selinus,
  8. et vada dura lego saxis Lilybeia caecis.
  9. Hinc Drepani me portus et inlaetabilis ora
  10. accipit. Hic, pelagi tot tempestatibus actis,
  11. heu genitorem, omnis curae casusque levamen,
  12. amitto Anchisen: hic me, pater optume, fessum
  13. deseris, heu, tantis nequiquam erepte periclis!
  14. Nec vates Helenus, cum multa horrenda moneret,
  15. hos mihi praedixit luctus, non dira Celaeno.
  16. Hic labor extremus, longarum haec meta viarum.
  17. Hinc me digressum vestris deus adpulit oris.
  18. Sic pater Aeneas intentis omnibus unus
  19. fata renarrabat divom, cursusque docebat.
  20. Conticuit tandem, factoque hic fine quievit.