Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Occiderit ferro Priamus, Troia arserit igni?
  2. Dardanium totiens sudarit sanguine litus?
  3. Non ita: namque etsi nullum memorabile nomen
  4. feminea in poena est, nec habet victoria laudem,
  5. extinxisse nefas tamen et sumpsisse merentis
  6. laudabor poenas, animumque explesse iuvabit
  7. ultricis flammae, et cineres satiasse meorum.
  8. Talia iactabam, et furiata mente ferebar:
  9. cum mihi se, non ante oculis tam clara, videndam
  10. obtulit et pura per noctem in luce refulsit
  11. alma parens, confessa deam, qualisque videri
  12. caelicolis et quanta solet, dextraque prehensum
  13. continuit, roseoque haec insuper addidit ore:
  14. Nate, quis indomitas tantus dolor excitat iras?
  15. Quid furis, aut quonam nostri tibi cura recessit?
  16. Non prius aspicies, ubi fessum aetate parentem
  17. liqueris Anchisen; superet coniunxne Creüsa,
  18. Ascaniusque puer? Quos omnes undique Graiae
  19. circum errant acies, et, ni mea cura resistat,
  20. iam flammae tulerint inimicus et hauserit ensis.