Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. eminus intorquet. Murali concita numquam
  2. tormento sic saxa fremunt, nec fulmine tanti
  3. dissultant crepitus. Volat atri turbinis instar
  4. exitium dirum hasta ferens orasque recludit
  5. loricae et clipei extremos septemplicis orbes.
  6. Per medium stridens transit femur. Incidit ictus
  7. ingens ad terram duplicato poplite Turnus.
  8. Consurgunt gemitu Rutuli, totusque remugit
  9. mons circum, et vocem late nemora alta remittunt.
  10. Ille humilis supplexque oculos, dextramque precantem
  11. protendens, Equidem merui nec deprecor, inquit:
  12. utere sorte tua. Miseri te siqua parentis
  13. tangere cura potest, oro (fuit et tibi talis
  14. Anchises genitor), Dauni miserere senectae
  15. et me seu corpus spoliatum lumine mavis
  16. redde meis. Vicisti, et victum tendere palmas
  17. Ausonii videre; tua est Lavinia coniunx:
  18. ulterius ne tende odiis. Stetit acer in armis
  19. Aeneas, volvens oculos, dextramque repressit;
  20. et iam iamque magis cunctantem flectere sermo