Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. multaque per maestum demens effata furorem
  2. purpureos moritura manu discindit amictus
  3. et nodum informis leti trabe nectit ab alta.
  4. Quam cladem miserae postquam accepere Latinae,
  5. filia prima manu flavos Lavinia crinis
  6. et roseas laniata genas, tum cetera circum
  7. turba furit: resonant late plangoribus aedes.
  8. Hinc totam infelix volgatur fama per urbem.
  9. Demittunt mentes; it scissa veste Latinus,
  10. coniugis attonitus fatis urbisque ruina,
  11. canitiem immundo perfusam pulvere turpans.
  12. Multaque se incusat, qui non acceperit ante
  13. Dardanium Aenean generumque adsciverit ultro.
  14. Interea extremo bellator in aequore Turnus
  15. palantis sequitur paucos iam segnior atque
  16. iam minus atque minus successu laetus equorum
  17. attulit hunc illi caecis terroribus aura
  18. commixtum clamorem adrectasque impulit aures
  19. confusae sonus urbis et inlaetabile murmur.
  20. Ei mihi! Quid tanto turbantur moenia luctu?