Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Ille furens, et saeva Iovis sic numina pellunt,
  2. deserit obsessos collis, nemora aspera linquit.
  3. Vix e conspectu exierat campumque tenebat,
  4. cum pater Aeneas saltus ingressus apertos
  5. exsuperatque iugum silvaque evadit opaca.
  6. Sic ambo ad muros rapidi totoque feruntur
  7. agmine nec longis inter se passibus absunt;
  8. ac simul Aeneas fumantis pulvere campos
  9. prospexit longe Laurentiaque agmina vidit,
  10. et saevum Aenean adgnovit Turnus in armis
  11. adventumque pedum flatusque audivit equorum.
  12. Continuoque ineant pugnas et proelia temptent,
  13. ni roseus fessos iam gurgite Phoebus Hibero
  14. tinguat equos noctemque die labente reducat:
  15. considunt castris ante urbem et moenia vallant.