Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. cuspidis Ausoniae, lacrimis ita fatur obortis.
  2. Tene, inquit, miserande puer, cum laeta veniret,
  3. invidit Fortuna mihi, ne regna videres
  4. nostra neque ad sedes victor veherere paternas?
  5. Non haec Evandro de te promissa parenti
  6. discedens dederam, cum me complexus euntem
  7. mitteret in magnum imperium metuensque moneret
  8. acris esse viros, cum dura proelia gente.
  9. Et nunc ille quidem spe multum captus inani
  10. fors et vota facit cumulatque altaria donis:
  11. nos iuvenem exanimum et nil iam caelestibus ullis
  12. debentem vano maesti comitamur honore.
  13. Infelix, nati funus crudele videbis!
  14. Hi nostri reditus expectatique triumphi!
  15. Haec mea magna fides! At non, Evandre, pudendis
  16. vulneribus pulsum adspicies nec sospite dirum
  17. optabis nato funus pater. Ei mihi, quantum
  18. praesidium Ausonia et quantum tu perdis, Iule!
  19. Haec ubi deflevit, tolli miserabile corpus
  20. imperat et toto lectos ex agmine mittit