Eclogues

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. hic tantum Boreae curamus frigora, quantum
  2. aut numerum lupus, aut torrentia flumina ripas.
Corydon
  1. Stant et iuniperi, et castaneae hirsutae;
  2. strata iacent passim sua quaque sub arbore poma;
  3. omnia nunc rident: at si formosus Alexis
  4. montibus his abeat, videas et flumina sicca.
Thyrsis
  1. Aret ager; vitio moriens sitit aeris herba;
  2. Liber pampineas invidit collibus umbras:
  3. Phyllidis adventu nostrae nemus omne virebit,
  4. Iuppiter et laeto descendet plurimus imbri.
Corydon
  1. Populus Alcidae gratissima, vitis Iaccho,
  2. formosae myrtus Veneri, sua laurea Phoebo;
  3. Phyllis amat corylos: illas dum Phyllis amabit,
  4. nec myrtus vincet corylos, nec laurea Phoebi.
Thyrsis
  1. Fraxinus in silvis pulcherrima, pinus in hortis,
  2. populus in fluviis, abies in montibus altis:
  3. saepius at si me, Lycida formose, revisas,
  4. fraxinus in silvis cedat tibi, pinus in hortis.
  5. Haec memini, et victum frustra contendere Thyrsim:
  6. ex illo Corydon Corydon est tempore nobis.