Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. candida nunc molli subeant conuiuia luco;
  2. blanditiaeque fluant per mea colla rosae,
  3. uinaque fundantur prelis elisa Falernis,
  4. terque lauet nostras spica Cilissa comas.
  5. ingenium positis irritet Musa poetis:
  6. Bacche, soles Phoebo fertilis esse tuo.
  7. ille paludosos memoret seruire Sycambros,
  8. Cepheam hic Meroen fuscaque regna canat,
  9. hic referat sero confessum foedere Parthum:
  10. ‘reddat signa Remi, mox dabit ipse sua:
  11. siue aliquid pharetris Augustus parcet Eois,
  12. differat in pueros ista tropaea suos.
  13. gaude, Crasse, nigras si quid sapis inter harenas:
  14. ire per Euphraten ad tua busta licet.’
  15. sic noctem patera, sic ducam carmine, donec
  16. iniciat radios in mea uia dies.