Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. Dulcis ad hesternas fuerat mihi rixa lucernas
  2. vocis et insanae tot maledicta tuae.
  3. tu vero nostros audax invade capillos
  4. et mea formosis unguibus ora nota,
  5. tu minitare oculos subiecta exurere flamma,
  6. fac mea rescisso pectora nuda sinu!
  7. cum furibunda mero mensam propellis et in me
  8. proicis insana cymbia plena manu,
  9. nimirum veri dantur mihi signa caloris:
  10. nam sine amore gravi femina nulla dolet.
  11. quae mulier rabida iactat convicia lingua,
  12. haec Veneris magnae volvitur ante pedes.