Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- tu satius memorem Musis imitere Philitan
- et non inflati somnia Callimachi.
- nam rursus licet Aetoli referas Acheloi,
- fluxerit ut magno fractus amore liquor,
- atque etiam ut Phrygio fallax Maeandria campo
- errat et ipsa suas decipit unda vias,
- qualis et Adrasti fuerit vocalis Arion,
- tristis ad Archemori funera victor equus:
- non Amphiareae prosint tibi fata quadrigae
- aut Capanei magno grata ruina Iovi.
- desine et Aeschyleo componere verba coturno,
- desine, et ad mollis membra resolve choros.
- incipe iam angusto versus includere torno,
- inque tuos ignis, dure poeta, veni.
- tu non Antimacho, non tutior ibis Homero:
- despicit et magnos recta puella deos.
- sed non ante gravis taurus succumbit aratro,
- cornua quam validis haeserit in laqueis,
- nec tu iam duros per te patieris amores:
- trux tamen a nobis ante domandus eris.