Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. ac veluti primo taurus detractat aratra,
  2. post venit assueto mollis ad arva iugo,
  3. sic primo iuvenes trepidant in amore feroces,
  4. dehinc domiti post haec aequa et iniqua ferunt.
  5. turpia perpessus vates est vincla Melampus,
  6. cognitus Iphicli surripuisse boves;
  7. quem non lucra, magis Pero formosa coegit,
  8. mox Amythaonia nupta futura domo.
  1. Multa prius dominae delicta queraris oportet,
  2. saepe roges aliquid, saepe repulsus eas,
  3. et saepe immeritos corrumpas dentibus unguis,
  4. et crepitum dubio suscitet ira pede!
  5. nequiquam perfusa meis unguenta capillis,
  6. ibat et expenso planta morata gradu.
  7. non hic herba valet, non hic nocturna Cytaeis,
  8. non Perimedaeae gramina cocta manus;
  9. nam cui non ego sum fallaci praemia vati?
  10. quae mea non decies somnia versat anus?
  11. quippe ubi nec causas nec apertos cernimus ictus,
  12. unde tamen veniant tot mala caeca via est;