Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- in me tela manent, manet et puerilis imago:
- sed certe pennas perdidit ille suas;
- evolat heu nostro quoniam de pectore nusquam,
- assiduusque meo sanguine bella gerit.
- quid tibi iucundum est siccis habitare medullis?
- si pudor est, alio traice tela una!
- intactos isto satius temptare veneno:
- non ego, sed tenuis vapulat umbra mea.
- quam si perdideris, quis erit qui talia cantet,
- (haec mea Musa levis gloria magna tua est),
- qui caput et digitos et lumina nigra puellae,
- non tot Achaemeniis armantur etrusca sagittis
- spicula quot nostro pectore fixit Amor.
- hic me tam gracilis vetuit contemnere Musas,
- iussit et Ascraeum sic habitare nemus,
- non ut Pieriae quercus mea verba sequantur,
- aut possim Ismaria ducere valle feras,
- sed magis ut nostro stupefiat Cynthia versu:
- tunc ego sim Inachio notior arte Lino.
- non ego sum formae tantum mirator honestae,