Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. nam me non ullae poterunt corrumpere, de te
  2. quin ego, vita, tuo limine verba querar;
  3. nec me deficiet nautas rogitare citatos
  4. 'dicite, quo portu clausa puella meast?',
  5. et dicam 'licet Artaciis considat in oris,
  6. et licet Hylaeis, illa futura meast.'
  1. Hic erit! hic iurata manet! rumpantur iniqui!
  2. vicimus: assiduas non tulit illa preces.
  3. falsa licet cupidus deponat gaudia livor:
  4. destitit ire novas Cynthia nostra vias.
  5. illi carus ego et per me carissima Roma
  6. dicitur, et sine me dulcia regna negat.
  7. illa vel angusto mecum requiescere lecto
  8. et quocumque modo maluit esse mea,
  9. quam sibi dotatae regnum vetus Hippodamiae,
  10. et quas Elis opes apta pararat equis.
  11. quamvis magna daret, quamvis maiora daturus,
  12. non tamen illa meos fugit avara sinus.
  13. hanc ego non auro, non Indis flectere conchis,
  14. sed potui blandi carminis obsequio.