Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- nudus Amor formam non amat artificem.
- aspice quos summittat humus non fossa colores,
- ut veniant hederae sponte sua melius,
- surgat et in solis formosior arbutus antris,
- et sciat indocilis currere lympha vias.
- litora nativis praefulgent picta lapillis,
- et volucres nulla dulcius arte canunt.
- non sic Leucippis succendit Castora Phoebe,
- Pollucem cultu non Helaira soror;
- non, Idae et cupido quondam discordia Phoebo,
- Eueni patriis filia litoribus;
- nec Phrygium falso traxit candore maritum
- avecta externis Hippodamia rotis:
- sed facies aderat nullis obnoxia gemmis,
- qualis Apelleis est color in tabulis.