Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- vos remanete, quibus facili deus annuit aure,
- sitis et in tuto semper amore pares.
- nam me nostra Venus noctes exercet amaras,
- et nullo vacuus tempore defit Amor.
- hoc, moneo, vitate malum: sua quemque moretur
- cura, neque assueto mutet amore torum.
- quod si quis monitis tardas adverterit aures,
- heu referet quanto verba dolore mea!
- Quid iuvat ornato procedere, vita, capillo
- et tenuis Coa veste movere sinus,
- aut quid Orontea crines perfundere murra,
- teque peregrinis vendere muneribus,
- naturaeque decus mercato perdere cultu,
- nec sinere in propriis membra nitere bonis?
- crede mihi, non ulla tuaest medicina figurae: