Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- quid tantum merui? quae te mihi crimina mutant?
- an nova tristitiae causa puella tuae?
- sic mihi te referas, levis, ut non altera nostro
- limine formosos intulit ulla pedes.
- quamvis multa tibi dolor hic meus aspera debet,
- non ita saeva tamen venerit ira mea,
- ut tibi sim merito semper furor, et tua flendo
- lumina deiectis turpia sint lacrimis.
- an quia parva damus mutato signa colore,
- et non ulla meo clamat in ore fides?
- vos eritis testes, si quos habet arbor amores,
- fagus et Arcadio pinus amica deo.