Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. ille meos numquam patitur requiescere postes,
  2. arguta referens carmina blanditia:
  3. 'ianua vel domina penitus crudelior ipsa,
  4. quid mihi tam duris clausa taces foribus?
  5. cur numquam reserata meos admittis amores,
  6. nescia furtivas reddere mota preces?
  7. nullane finis erit nostro concessa dolori,
  8. turpis et in tepido limine somnus erit?
  9. me mediae noctes, me sidera prona iacentem,
  10. frigidaque Eoo me dolet aura gelu.
  11. o utinam traiecta cava mea vocula rima
  12. percussas dominae vertat in auriculas!
  13. sit licet et saxo patientior illa Sicano,
  14. sit licet et ferro durior et chalybe,
  15. non tamen illa suos poterit compescere ocellos,
  16. surget et invitis spiritus in lacrimis.
  17. nunc iacet alterius felici nixa lacerto,
  18. at mea nocturno verba cadunt Zephyro.
  19. sed tu sola mei, tu maxima causa doloris,
  20. victa meis numquam, ianua, muneribus,