Carmina
Catullus
Catullus, Gaius Valerius. Carmina. Merrill, Elmer Truesdell, editor. Boston: Ginn, 1893.
- Odi et amo. quare id faciam fortasse requiris
- nescio, sed fieri sentio et excrucior.
- Quintia formosa est multis, mihi candida, longa,
- recta est. haec ego sic singula confiteor,
- totum illud “formosa” nego: nam nulla venustas,
- nulla in tam magno est corpore mica salis.
- Lesbia formosa est, quae cum pulcherrima tota est,
- tum omnibus una omnis subripuit Veneres.
- Nulla potest mulier tantum se dicere amatam
- vere, quantum a me Lesbia amata mea es
- nulla fides ullo fuit unquam in foedere tanta
- quanta in amore tuo ex parte reperta mea est.