Poenulus

Plautus, Titus Maccius

Plautus. Plauti Comoediae, Volume 2. Leo, Friedrich, editor. Berlin: Weidmann, 1896.

  1. contentiores mage erunt atque avidi minus,
  2. quom scibunt, Veneri ut adierit leno manum.
  3. condigne haruspex, non homo trioboli,
  4. omnibus in extis aibat portendi mihi
  5. malum damnumque et deos esse iratos mihi.
  6. quid ei divini aut humani aequomst credere?
  7. mina mihi argenti dono postilla datast.
  8. sed quaeso, ubi nam illic restitit miles modo,
  9. qui hanc mihi donavit, quem ego vocavi ad prandium?
  10. sed eccum incedit.
Antamonides
  1. Ita ut occepi dicere,
  2. lenulle, de illa pugna Pentetronica,
  3. quom sexaginta milia hominum uno die
  4. volaticorum manibus occidi meis.
Lyc.
  1. Volaticorum hóminum?
Antam.
  1. Ita dico quidem.
Lyc.
  1. An, opsecro, usquam sunt homines volatici?
Antam.
  1. Fuere. verum ego interfeci.
Lyc.
  1. Quo modo
  2. potuisti?