Hamartigenia
Prudentius
Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).
- si vim mentis hebes stupor obsidet, aspice saltem
- obvia terrenis oculis elementa, quibus se
- res occulta Dei dignata est prodere signis,
- hanc heresin praesaga Patris praeviderat olim
- maiestas: fore qui rectorem lucis et orbis
- scinderet in partes geminatum segrege regno,
- idcirco specimen posuit spectabile nostris
- exemplumque oculis, ne quis duo numina credat
- imperitare, vagis mundi per inania formis. 1
- una per inmensam caeli caveam revolutos
- praebet flamma dies, texit sol unicus annum;
- triplex ille tamen nullo discrimine trina
- subnixus ratione viget, splendet, volat, ardet,
- motu agitur, fervore cremat, tum lumine fulget.
- sunt tria nempe simul, lux et calor et vegetamen,
- una eademque tamen rota sideris indiscretis
- fungitur his, uno servat tot munera ductu
- et tribus una subest mixtim substantia rebus.
- non conferre Deo velut aequiperabile quidquam
- ausim, nec Domino famulum conponere signum;
p.210