Cathemerina
Prudentius
Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).
- qui corpus istud molle naturaliter,
- captumque laxo sub voluptatum iugo,
- virtutis arta lege fecit liberum,
- emancipator servientis plasmatis,
- regnantis ante victor et cupidinis.
- inhospitali namque secretus loco
- quinis diebus octies labentibus
- nullam ciborum vindicavit gratiam,
- firmans salubri scilicet ieiunio
- vas adpetendis inbecillum. gaudiis.
- miratus hostis posse limum tabidum
- tantum laboris sustinere ac perpeti
- explorat arte sciscitator callida
- deusne membris sit receptus terreis,
- sed increpata fraude post tergum ruit.
- hoc nos sequamur quisque nunc pro viribus,
- quod consecrati tu magister dogmatis
- tuis dedisti, Christe, sectatoribus,
- ut, cum vorandi vicerit libidinem,
- late triumphet imperator spiritus.