Cathemerina
Prudentius
Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).
- hic ille rex est gentium
- populique rex Iudaici,
- promissus Abrahae patri
- eiusque in aevum semini.
- aequanda nam stellis sua
- cognovit olim germina
- primus sator credentium,
- nati inmolator unici.
- iam flos subit Daviticus
- radice Iessea editus,
- sceptrique per virgam virens
- rerum cacumen occupat.’
- exim sequuntur perciti
- fixis in altum vultibus,
- qua stella sulcum traxerat
- claramque signabat viam,
- sed verticem pueri supra
- signum pependit inminens,
- pronaque submissum face
- caput sacratum prodidit.
p.106