Psychomachia
Prudentius
Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).
- unguentum regale datum est et chrisma perenne,
- ut tener incessus vestigia syrmate verrat
- sericaque infractis fluitent ut pallia membris,
- post inmortalem tunicam quam pollice docto
- texuit alma Fides, dans inpenetrabile tegmen
- pectoribus lotis, dederat quibus ipsa renasci,
- inde ad nocturnas epulas, ubi cantharus ingens
- despuit effusi spumantia damna Falerni
- in mensam cyathis stillantibus, uda ubi multo
- fulcra mero veterique toreumata rore rigantur?
- excidit ergo animis eremi sitis, excidit ille
- fons patribus de rupe datus, quem mystica virga
- elicuit scissi salientem vertice saxi?
- angelicusne cibus prima in tentoria vestris
- fluxit avis, quem nunc sero felicior aevo
- vespertinus edit populus de corpore Christi?
- his vos inbutos dapibus iam crapula turpis
- Luxuriae ad madidum rapit inportuna lupanar,
- quosque viros non Ira fremens, non idola bello
- cedere conpulerant, saltatrix ebria flexit!