Psychomachia
Prudentius
Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).
- Christe, graves hominum semper miserate labores,
- qui patria virtute cluis propriaque, Sed una,
- (unum namque Deum colimus de nomine utroque,
- non tamen et solum, quia tu Deus ex Patre, Christe,)
- dissere, rex noster, quo milite pellere culpas
- mens armata queat nostri de pectoris antro,
- exoritur quotiens turbatis sensibus intus
- seditio atque animam morborum rixa fatigat,
- quod tunc praesidium pro libertate tuenda
- quaeve acies furiis inter praecordia mixtis
- obsistat meliore manu. nec enim, bone ductor,
- magnarum virtutum inopes nervisque carentes
- Christicolas vitiis populantibus exposuisti,
- ipse salutiferas obsesso in corpore turmas
- depugnare iubes, ipse excellentibus armas
- artibus ingenium, quibus ad ludibria cordis
- oppugnanda potens tibi dimicet et tibi vincat,
- vincendi praesens ratio est, si comminus ipsas
- Virtutum facies et conluctantia contra
- viribus infestis liceat portenta notare.
p.280