Liber Peristephanon
Prudentius
Prudentius, Volume 2. Thomson, H. J, editor. London; Cambridge, Mass.: William Heinemann Ltd., Harvard University Press, 1953 (printing).
- rex, inquit, ‘orbis maximus,
- qui sceptra gestat Romula,1
- servire sanxit omnia
- priscis deorum cultibus.
- vos, Nazareni, adsistite,
- rudemque ritum spernite.
- haec saxa, quae princeps colit,
- placate fumo et victima.’
- exclamat hic Vincentius,
- Levita de tribu sacra,
- minister altaris Dei,
- septem ex columnis lacteis;
- ‘tibi ista praesint numina,
- tu saxa, tu lignum colas,
- tu mortuorum mortuus
- fias deorum pontifex.
- nos lucis auctorem Patrem
- eiusque Christum Filium,
- qui solus ac verus Deus,
- Datiane, confitebimur.’