Carmina

Paulinus of Nola, Saint

Paulinus of Nola. Sancti Pontii Meropii Paulini Carmina (Corpus Scriptorum Ecclesiasticorum Latinorum, Volume 30). Hartel, Wilhelm von, editor. Prague, Vienna, Leipzig: Tempsky, Freytag, 1894.

  1. quem prope corporeo praesentem uidimus actu
  2. obiectare manus flammis et nostra tueri
  3. limina iuncta suis, quae tamquam territa sancti
  4. obstantis facie prope tangens flamma pauebat
  5. pulsaque de nostri rapiendo culmine tecti,
  6. comminus in tuguri uicina strage perarsit.
  7. mira loquar, stetit inmotus sine flatibus aether
  8. nec nemorum foliis ullum dedit aura tremorem,
  9. ne posset rapidus procedere longius ignis
  10. per contexta uolans sociarum tigna domorum,
  11. sed uentis deserta cadentibus ire negaret
  12. flamma et consumpto moreretur languida pastu.
  13. consimili modo nos, Felix, ope solue periclis,
  14. nec domibus nostris propient mala, pulsaque per te
  15. horrida sanguineo longe sonet ira flagello.
  16. illam etiam uirtutem arcendis indue bellis,
  17. qua male labentem uicinis montibus amnem,
  18. qui subitis aucto pluuiis torrente redundans,
  19. sic tua praecipitans in limina saepe ruebat,
  20. ut tectis coniuncta tuis habitacula uastis