Carmina

Paulinus of Nola, Saint

Paulinus of Nola. Sancti Pontii Meropii Paulini Carmina (Corpus Scriptorum Ecclesiasticorum Latinorum, Volume 30). Hartel, Wilhelm von, editor. Prague, Vienna, Leipzig: Tempsky, Freytag, 1894.

  1. nunc oblite mei, cur me rogo uel cute nudum
  2. deseris? amisi caros, tua dona, iuuencos,
  3. saepe tibi supplex quos commendare solebam,
  4. quos tua perpetuo seruabat cura fauore
  5. pascebatque mihi. tua nam custodia saluos
  6. dextraque sufficiens illos praestabat opimos,
  7. quos misero mihi nox haec abstulit. heu quid agam nunc?
  8. quo deceptus eam? quem criminer? an tibi de te
  9. conquerar inmemoremque mei accusabo patronum,
  10. qui mihi sopito tam densum inrepere somnum,
  11. ne mea sentirem perfringere claustra latrones,
  12. passus es et nullo fregisti dura pauore
  13. pectora nec lucem tenebris furtoque dedisti?
  14. aut ullis profugos curasti prodere signis?
  15. qua modo discurram? quo deferar? omnia caecis
  16. structa mihi latebris; nunc et mea tecta uidentur
  17. clausa mihi, abductis ubi desolatus alumnis
  18. nil habeo, quod habere uelim, quod dulce uidenti,
  19. dulce laboranti non inrita gratia praestet,
  20. oblectans inopem sensu fructuque peculi.