Carmina

Orientius, Saint

Orientius, Saint. Poetae Christiani Minores, Pars I (Corpus scriptorum ecclesiasticorum latinorum, Volume 16, Part 1). Petschenig, Michael, editor; Ellis, Robinson, editor; Brandes, Wilhelm, editor; Schenkl, Karl, editor. Vienna, Leipzig, Prague: Tempsky, Freytag, 1888.

  1. ergo honor in Christo est, laus est patris, in patre Christi est.
  2. ipse patris mens est et sermo et testis et heres,
  3. ipse recognoscit quantum pater audet in ipso,
  4. ipse caput nostrum sapientia gratia uita est,
  5. ipse hominum custos speculator et arbiter ipse,
  6. ipse salutis iter, luxque immutabilis ipse,
  7. de uero uerus splendor, de lumine lumen,
  8. de bonitate bonus, de pleno et diuite plenus,
  9. prouidus indulgens clemens miserator abundans,
  10. perfectus patiens iustus pius inmaculatus,
  11. aeternum aeterni donum, tutela priorum,
  12. firmamentum animae, fuga daemonis, arma fidei,
  13. perpetuum regnans, censor iudexque futuri,
  14. tempore non clausus, clausurus tempora iussu,
  15. principium ac finis, uegetator et intus et extra,
  16. uelle tenens et posse potens et mite seuerus,
  17. pax mundi et gaudium, prauique bonique diremptor.
  18. naturae duplicis uir baiulus et mediator,
  19. dum, mortale quod est, deus inmortale probauit.
  20. o felix domini dominatio, nobile letum!