In Rufinum

Claudian

Claudian, Volume 1. Platnauer, Maurice, editor. Harvard University Press: Cambridge, MA; London, England, 1922.

  1. adsimulat mentemque palam proclamat amictu,
  2. nec pudet Ausonios currus et iura regentem
  3. sumere deformes ritus vestemque Getarum;
  4. insignemque habitum Latii mutare coactae
  5. maerent captivae pellito iudice leges.
  6. Quis populi tum vultus erat! quae murmura furtim!
  7. (nam miseris ne flere quidem aut lenire dolorem
  8. colloquiis impune licet): “quonam usque feremus
  9. exitiale iugum? durae quis terminus umquam
  10. sortis erit? quis nos funesto turbine rerum
  11. aut tantis solvet lacrimis, quos barbarus illinc,
  12. hinc Rufinus agit, quibus arva fretumque negatur?
  13. magna quidem per rura lues, sed maior oberrat
  14. intra tecta timor. tandem succurre ruenti
  15. heu patriae, Stilicho! dilecta hic pignora certe,
  16. hic domus, hic thalamis primum genialibus omen,
  17. hic tibi felices erexit regia taedas.
  18. vel solus sperate veni. te proelia viso
  19. languescent avidique cadet dementia monstri.”
  20. Talibus urgetur discors Aurora procellis.