de Bello Gothico

Claudian

Claudian, Volume 2. Platnauer, Maurice, editor. Harvard University Press: Cambridge, MA; London, England, 1922.

  1. auxiliis. ibat patiens dicionis Alanus,
  2. qua nostrae iussere tubae, mortemque petendam
  3. pro Latio docuit gentis praefectus Alanae,
  4. cui natura breves animis ingentibus artus
  5. finxerat inmanique oculos infecerat ira ;
  6. vulneribus pars nulla vacat rescissaque contis
  7. gloria foedati splendet iactantior oris,
  8. ille tamen mandante procul Stilichone citatis
  9. acceleravit equis Italamque momordit harenam.
  10. felix Elysiisque plagis et carmine dignus,
  11. qui male suspectam nobis impensius arsit
  12. vel leto purgare fidem ; qui iudice ferro
  13. diluit inmeritum laudato sanguine crimen !
  14. morte viri turbatus eques flectebat habenas
  15. totaque praeciso nutassent agmina cornu,
  16. ni celer instructa Stilicho legione secutus
  17. subsidiis peditum pugnam instaurasset equestrem.
  18. Quis Musis ipsoque licet Paeane recepto
  19. enarrare queat, quantum Gradivus in ilia
  20. luce suae dederit fundator originis urbi ?