De consolatione philosophiae

Boethius

Boethius. Anicii Manlii Severini Boethii Philosophiae Consolationis (Corpus scriptorum ecclesiasticorum Latinorum, Volume 67). Weinberger, Wilhelm, editor. Vienna, Leipzig: Hoelder-Pichler Tempsky, Akademische Verlags Gesellschaft, 1934.

  1. Cum polo Phoebus roseis quadrigis
  2. lucem spargere coeperit,
  3. pallet albentes hebetata vultus
  4. flammis stella prementibus.
  5. Cum nemus flatu Zephyri tepentis
  6. vernis inrubuit rosis,
  7. spiret insanum nebulosus Auster,
  8. iam spinis abeat decus.
  9. Saepe tranquillo radiat sereno
  10. immotis mare fluctibus,
  11. saepe ferventes Aquilo procellas
  12. verso concitat aequore.
  13. Rara si constat sua forma mundo,
  14. si tantas variat vices,
  15. crede fortunis hominum caducis,
  16. bonis crede fugacibus!
  17. Constat aeterna positumque lege est,
  18. ut constet genitum nihil