De consolatione philosophiae

Boethius

Boethius. Anicii Manlii Severini Boethii Philosophiae Consolationis (Corpus scriptorum ecclesiasticorum Latinorum, Volume 67). Weinberger, Wilhelm, editor. Vienna, Leipzig: Hoelder-Pichler Tempsky, Akademische Verlags Gesellschaft, 1934.

  1. Quisquis composito serenus aevo
  2. fatum sub pedibus egit superbum
  3. fortunamque tuens utramque rectus
  4. invictum potuit tenere vultum,
  5. non illum rabies minaeque ponti
  6. versum funditus exagitantis aestum
  7. nec ruptis quotiens vagus caminis
  8. torquet fumificos Vesaevus ignes
  9. aut celsas soliti ferire turres
  10. ardentis via fulminis movebit.
  11. Quid tantum miseri saevos tyrannos
  12. mirantur sine viribus furentes?
  13. Nec speres aliquid nec extimescas,
  14. exarmaveris impotentis iram;
  15. at quisquis trepidus pavet vel optat,
  16. quod non sit stabilis suique iuris,
  17. abiecit clipeum locoque motus
  18. nectit, qua valeat trahi, catenam.